خبر حلو

انهاردة صدر حكم الافراج التانى عن كل من:

د/ محمود غزلان

د/محى حامد

د/مصطفى الغنيمى

حكم الافراج الثانى بيكون واجب التنفيذ بمعنى انه لا يمكن الطعن عليه يعنى ان شاء الله فى خلال 48 ساعة هيكون كل منهم فى بيته سالما

و يأتى هذا الافراج بعد شهرين من صدور قرار اعتقال لهم

و يذكر ان قرار الاعتقال كان قد صدر بعد ان حكم لهم بالافراج من المحكمة بعد استنفاذهم مدة الحبس الاحتياطى و التى هى خمسة اشهر

مبروك للمفرج عنهم و لاهاليهم و تقبل الله منكم و جعله الله فى ميزان حسناتكم ان شاء الله

و ان شاء الله نيجى نسلم عليكوا فى البيت قريب

يوم الخميس 9/8/2007

السلام عليكم

قبل ما ادخل فى موضوع التدوينه و ماذا يمثل تاريخ 9/8/2007 فيه بعض الحاجات اللى لابد من الحديث عنها

اولها

حملة الاعتقالات الاخيرة

و اعتقال د/عصام العريان بصراحة الخبر محبط جدا و خلانى افكر....لحد امتى هنفضل مترقبين يا ترى الدور على مين دلوقتى؟

و لحد امتى امثال د/عصام و د/سناء و غيرهم هيفضلوا مستنيين هما و اسرهم يا ترى الاعتقال الجاى امتى؟

و لحد امتى هيفضل الظلمة متجبرين فى الارض و محدش قادر يمنعهم؟

ربنا يا رب يثبتهم جميعا و يرزقهم الصبر و يربط على قلوبهم و يفرج عنهم فى القريييب العاجل ان شاء الله

و ربنا يا رب يورينا فى الظالم يوم و حسبنا الله و نعم الوكيل

تانى حاجة

انا التدوينة اللى فاتت قلت ان التدوينة الجاية_اللى هى دى_ هتبقى لمحمد ان شاء الله و بصراحة انا حاولت بس لسة لم ينفذ قضاء الله فانالاقيت الموضوع طول و الناس زهقت

فقلت هاكتب المرة دى وربنا ييسر و محمد يكتب المرة الجاية(بس ماوعدكوش) ادعوا انتوا بس و ربنا يسهل ان شاء الله

ماذا حدث يوم الخميس9/8/2007 ؟

اليوم دة كان يوم خروج محمد

اليوم دة كان اول مرة من خمس شهور ارد على الرقم الغريب اللى بيتصل على الموبايل الاقى محمد بيقولى انا فى وسط البلد و مروح دلوقتى بدل ما يقولى انا فى النيابة و هادخل لوكيل النيابة دلوقتى

كان كمان اول مرة من خمس شهور اشوف محمد فى مكان غير ساحة الزيارة التابعة لسجن مزرعة طرة العمومى

و كان اول مرة من خمس شهور اشوف محمد لابس لون مختلف عن اللون الابيض

و كان اول مرة من خمس شهور اشوف والدته و والده فرحانين كدة (بالذات والده لانه مكانش بيقدر يروح يزوه بسبب مرضه فكان بقاله فترة كبيرة جدا مشافهوش)

و كان اول مرة من خمس شهور محمد يجيلنا البيت بدل ما اروحله انا الزيارة

و كان اول مرة على الاطلاق محمد يخرج من امن الدولة فى نفس يوم ترحيله الى هناك

و فى نفس اليوم نتيجتى طلعت و نجحت الحمد لله

اليوم دة كان نعمة و فضل كبيرين من ربنا و ربنا يقدرنا ان نشكر نعمته التى انعمها علينا فى اليوم دة

و لكن كحال الدنيا لا تكتمل فيها الفرحة و لابد من وجود منغصات فى نفس اليوم صدر قرار اعتقال د/محمود غزلان و د/محى حامد و د/مصطفى الغنيمى

فالحمد لله على كل حال و ربنا يتم عليهم نعمته بالافراج عنهم و عن بقية المعتقلين بإذن الله

فى خبر اخير المفترض انه خبر سعيد و هو خبر سعيد و مؤلم فى نفس الوقت

الخبر هو ان يوم الجمعة القادم ان شاء الله هيبقى عقد قران محمد محمود غزلان

فالاول هادعى لمحمد و حبيبة

بارك الله لكما و بارك عليكما و جمع بينكما فى خير

بارك الله لكما و بارك عليكما و جمع بينكما فى خير

بارك الله لكما و بارك عليكما و جمع بينكما فى خير

و بعديها هادعى على الظالمين

اللى حرموا د/ محمود غزلان انه يكون موجود فى يوم زى دة بجانب ابنه زى ما حرموه قبل كدة انه يحضر زواج بنته لما كان محكوم عليه بخمس سنين فى محاكمة عسكرية

حسبنا الله فى الظالمين

جزاكم الله خيرا

السلام عليكم

معلش اخبارى دايما متأخرة بس زى ما عبد المنعم نزل

محمد وصل البيت الحمد لله امبارح الساعة خامسة و هو بخير حال و الحمد لله

لكن للأسف د/محمود غزلان و د/ مصطفى الغنيمى و د/محى حامد صدرلهم قرار اعتقال فتسألكم الدعاء لهم بالفرج القريب ان شاء الله

جزاكم الله خيرا لكل من شاركنا بدعاء او بسؤال اوبتدوينة او بشعور نبيل

و عقبال الافراج عن جميع المعتقلين ان شاء الله

و اخيرا

استأذن انا بقى قبل ما اتطرد و ان شاء الله البوست الجاى يبقى من محمد

و السلام ختام

13/3/2007

السلام عليكم

اترددت كتيير قبل ما اكتب البوست دة لاسباب مش مجال ذكرها دلوقتى بس المهم أن انا في الاخر قررت انى اكتبه....قررت أن انا اكتب عن ليلة 13/3/2007 و هي ليلة ما محمد اتقبض عليه...

نبدأ الموضوع من الاول شوية ....
يوم الاتنين 12/3/2007 كنت راجعة من الكلية على الساعة خامسة تقريبا....هلكانة كالعادة...كلمت محمد عااادى جدا و دخلت نمت شوية عشان بعد كدة اصحى اذاكر عشان كان عندى امتحان ميد ترم يوم الاربعاء
صحيت الساعة عشرة لاقيت محمد متكلم على الموبايل اربع مرات...اتصلت بيه لاقيت الموبايل مغلق....قلت عادى شوية و هيخلص "المشوار" اللى هو فيه و يتكلم و قمت و صليت العشاء و حضرت مذاكرتى و جربت اتصل تانى بردو التليفون مغلق....قلقت...و لمدة ساعة و نص كل شوية اتصل و الاقيه مغلق.....لدرجة أن انا قلت هلاقى حد من اصاحبه متصل يقولى انه اتاخد فعلا.....و طبعا لا ذاكرت ولا بصيت في كتاب

فيييييييييين بقى على الساعة 12:30 كدة محمد ربنا كرمه و اتصل...(.و مفيش داعى للخوض في تفاصيل

المكالمة )...قاللى الموبايل خلص شحنه و انا مروح دلوقتى ولما اوصل هاكلمك ...و فعلا وصل البيت الحمد لله ...واتصل بيا...الساعة دلوقتى 1:30 و عرفت أن د/محمود غزلان اتقبض عليه و انهم مشغولين كانوا مع محمد غزلان ..و بعدين قعد يطمنى أن كدة الليلة عدت خلاص و ان مفيش قلق خلاص و روحى ذاكرى و اطمنى.... و مكملش كلامه و لقيته بيقولى لحظة واحدة ...قام و رجع

محمد: إيمان انا باتاخد
انا: يعنى ايه ؟ ايه اللى حصل؟
محمد: عربية الترحيلات تحت البيت اهة و الله........سلام دلوقتى
انا: لأ استنى لحظة فهمنى ايه اللى حصل
محمد: طيب استنى لحظة

اتصل بوليد صاحبة قال له أن هو انهم جم ياخدوا ووصاه يطمن على والده ووالدته و قفل معاه..و رجع كلمنى تانى....

محمد: انا لازم اقفل دلوقتى هيكسروا الباب ولازم اصحى ماما و بابا عشان ميتخضوش ....كلمى اسلام قوليله... و ابقى كلمى ماما و بابا اطمنى عليهم...و ادعيلى....لا إله الا الله

بصراحة انا مش فاكرة انا رديت قلت ايه...او اذا كنت رديت اصلا...لان انا غالبا لما باتخض بارتبك و مش باعرف اكلم اصلا

قفلت معاه و كلمت زوجة اسلام قلتلها على اللى حصل....قعدت توصينى انى ادعيله بالثبات و الصبر

بعد شوية اتصلت في البيت عند محمد...والدته اللى ردت عليا...كان الناس لسه عندهم بيفتشوا ....طبعا طنط كانت بتعيط و حاولت اهديها بس كان صعب اوى انها تهدى و هي شايفها ابنها بتاخد منها منغير ذنب...دة غير أن انا اصلا مكنتش لاقية حاجة اقولها ممكن تهون عليها...طبعا حاولت تخلي محمد يكلمنى و طبعا الظابط مرضيش ....فقالتلى ادعيله يا ايمان و متزعليش و قفلت معاها

الساعة دلوقتى كانت تقريبا 2:30 ...والدتى صحيت من النوم....حكيتلها على اللى حصل...قعدت تهدينى شوية و بعدين قالتلى شوية و كلميهم اطمنى عليهم و قومى دلوقتى اتوضى و صلى و ادعيله...

قمت فعلا اتوضيت و بعدين كلمت طنط تانى ...قالتلى انهم لسة نازلين دلوقتى بعد ما اخدوا اللى ربنا قدرهم عليه....ووصتنى على امتحانى و مذاكرتى

قفلت معاها و قمت اصلى ركعتين...و انا واقفة اصلى قرأت الفاتحة و سبحان الله زى ما اكون نسيت اى حاجة انا حفظاها من القرآن و مش على بالى غير آية واحدة بس قعدت ارددها طول اربع ركات الآية كانت

"ولا تحسبن الله غافلا عما يعمل الظالمون"

و كانت نعمة كبييرة اوى من ربنا لأن الآية دى ثبتتنى جدا في الوقت دة

خلصت صلاتى و قعدت ادعى و اقرأ قرآن لحد ما الفجر اذن ... صليت الفجر و قلت الاذكار ...حاولت انام معرفتش ...فدخلت على النت و قريت الخبر على أنا أخوان و قريت التدوينة بتاعة أ/مجدى سعد....و قمت احضر نفسى عشان انزل الكلية

دة كان تقريبا اللى حصل ليلتها....و على اى حال هي ليلة لن انساها

ربنا يفك اسر جميع المعتقلين إن شاء الله .......

.و يخلص مصر من هذا النوع من الليالى التي لا تنسى قريبا بإذن الله

حسبنا الله و نعم الوكيل..نعم المولى..و نعم النصير

السلام عليكم

كنت فاكرة ان انا اخدت الاجازة و هابقى فاضية و اكتب اول بأول بس الحمد لله طلعت الاجازة ازحم من الدراسة

مشاريع .. تسليمات .. مناقشات .. كورسات

و الله اعلم ممكن يكون فيه ايه تانى

الله المستعان

المهم

هى بس شوية اخبار و صراحة مفيهاش خبر عدل .. فنسألكم الدعاء

اول خبر

كان خبر الازمة الصحية لاستاذى د/ عصام حشيش شفاه الله و عافاه

لكن الخبر اللى يمكن يكون كويس شويه هو ان انا عرفت دلوقتى انه عمل العملية الحمد لله و اعتقد انه افضل حالا دلوقتى

ربنا يتم شفائه إن شاء الله و يديم عليه نعمة الصحة و يفرج سجنه

اااااااااااااامين

الخبر التانى

هو ان د/ محمد سعد كمان اصيب بازمة قلبية يوم الخميس و تم نقله إلى مستشفى القصر العينى

و الحمد لله الحالة استقرت دلوقتى و مطلوب له عملية اسطرة و قرروا انه يفضل فى المستشفى لحد ما يعنل العملية ان شاء الله

نسألكم الدعاء له بالشفاء و ان ربنا يفرج عنه الكرب بإذن الله

الخبر التالت و الاخير

هو ان العرض كان امبارح.... هو انا كنت كتباه بالغلط يوم 26 بس هو كان 23... و كالعادة ....تجديد 15 يوم فالعرض الجاى هيبقى يوم 7/7 إن شاء الله

طبعا د/ محمد سعد عرضه كان متأجل للنهاردة و راحولوا المستشفى بس بردو اتجددله

مش هاوصيكم تانى الدعاااااااء يا جماعة

و جزاكم الله خيرا

اللهم اجعل الم د/ عصام و د/ محمد فى ميزان حسناتهم

و انتقم من الظالمين

امين يا رب العالمين

أخيييرا خبر حلو ..اللهم لك الحمد

السلام عليكم

لسة قارية دلوقتى خبر الإفراج عن عبد المنعم و كل من معه فى القضيه

الخبر على انا إخوان

اللهم لك الحمد

و من غير عرض كمان ... سبحان الله

و ان شاء الله قريب يفرج عن الجميع يإذن الله

واول الغيث قطرة

طبعا ناس كتيير بتشكك فى الخبر_من اللى شافوه الفترة اللى فاتت_ او بتقول مش هينفذوا...بس انا متفائلة خير و ان شاء الله هيطلعوا و ينزل ا/عبد المنعم اول تدوينة حرة بعد اتنين مسجونين

رسالة فى السريع : ا/عبد المنعم حمد الله على سلامة حضرتك و ربنا يكرمك و يعزك و يخفف عن الوالد إن شاء الله

بكرة الثلاثاء....يا رب فرجك

السلام عليكم

بصراحة يوم التلات دة بقى له ذكريات صعبة شويه عندى...و لسة بيكون ذكريات جديدة كل اسبوعين

التلات من اسبوعين فاتو كان العرض الرابع بتاع محمد.. و كان العرض الأول لعبد المنعم و حصلت المسرحية السخيفة جدا اللى حكاها اسلام (ثم بدا لهم من بعد ما رأو الآيات ليسجننه حتى حين) ..كمان فى نفس يوم التلات كان جلسة محكمة القضاء الإدارى بمجلس الدوله و اللى صدر فيها قرار الإفراج (اللى متنفذش) للمرة التالته عن المهندس خيرت الشاطر و اخوانه و فى نفس اليوم تم تحديد اول ايام المهزله العسكريه يوم الخميس

التلات دة بردو

عرض محمد على النيابه المرة الخامسة

عرض عبد المنعم الثانى

و جلسة النطق بالحكم فى مجلس الدوله لإبطال قرار رئيس الجمهوريه بالإحاله للقضاء العسكرى

و زاد على اللى فات ان المرة دى عبد المنعم و من معه قرروا بدء إضراب مفتوح عن الطعام إذا تم التجديد لهم بسبب المضايقات و سوء الرعاية الصحية و المعامله الغير آدمية اللى بيتعرضولها فى السجن

رجاء يا اخواننا اللى يقدر يروح بكرة امام النيابة يروح و يشاركهم

و اللى مش هيقدر يبقى نسألكم الدعاء لهم جميعا ... الدعاء بإن ربنا يزيل الغمة و يفرج عنهم و يثبتهم و يعينهم و يكف ايدى الظالمين عنهم

و ان ربنا يغفر لنا تقصيرنا فى حقهم و يجعلنا دائما مع الحق اينما كان.........آآآمين

ياااارب ورينا فيهم يوم

السلام عليكم

و الله بجد انا مش عارفة اخرتها إيه ....حسبى الله و نعم الوكيل

النهاردة الصبح قرأت خبر مداهمة بيت عبد المنعم محمود المدون الصحفى الإخوانى و بصراحة اتخنقت

انا مشفتش منعم غير مرات معدودة و لم اعرفة حتى الآن على المستوى الشخصى بس آخر مرة شفته كانت فى زيارة لمحمد, منعم كان لسة راجع من منتدى الجزيرة و كان معرفش ييجى لمحمد فى الزيارة الاستثنائيه اللى هيا كانت يوم سفره و اول ما رجع من السفر كان اول حاجة يعملها زى ما هو قال فى تدوينة (من الدوحة إلى طرة) إنه راح زار محمد و احنا يومها كنا عند محمد بردو و مش هاقول قد إيه محمد فرح بزيارته بس هاقول انه منعم كان اكتر واحد كلامه اثر فيا لما كتب عن محمد بعد اعتقاله

انا طبعا مش هاعرف اكتب عن منعم زى ما هو كتب عن محمد بس عايزة اقول حاجة واحدة هى ان ربنا ميرضاش باللى بيحصل دة و إن شاء الله فرجه قريب و ان شاء الله هيجى اليوم اللى تتجمعوا فيه تانى على قهوة ابو امين و تفتكروا الايام دى بس إن شاء الله ساعتها هيبقى ربنا خلصنا من مبارك و اعوانه واللى زيه ...و ربنا بيقول

(و لينصرن الله من نصره)

وفى الحديث القدسى

(من عادى لى وليا فقد آذنته بالحرب),

إن شاء الله شدة و تزول.

يا جماعة عبد المنعم والده مريض و الناس دى معندهاش قلب عشان تقدر حاجة زى كدة و لا عشان تقدر وجع قلب أمه و لا عواقب دعائها عليهم هى و والده هتبقى ايه ..يا ريت يا جماعة متنسوش منعم من دعائكم و ادعوا لوالده ووالدته ان ربنا يصبرهم و يحفظلهم ابنهم, و انا متأكدة إن محدش محتاج يوصى أصحاب منعم على اهله فى غيابه و آخر حاجة

حسبنا الله و نعم الوكيل

ربنا ينتقم من الظلمة و يورينا فيهم قدرته..و يحفظ منعم وكل شباب الدعوة من بطش الظالمين....آآآآآمين يا رب العالمين

دى المدونة اللى كتبها منعم عن محمد

غياب القصاص أن تغيب عن نفسك

من الصعب أن أكتب عن محمد القصاص لانه من الصعب أن يوفيه أحد جزء من حقه أوفضله عليه
ولكن أبدأ باحساس محمد في الفترة الاخيرة بأنها سيعتقل , بعد تدشين الحملة أعلن الطلاب فيها رفضهم للتعديلات الدستورية باسم نرفض قالي: الحملة دي محدش حيدفع تمنه غيرنا احنا الاتنين ( أنا هو ) حيث أن جهاز أمن الدولة يعدنا من النشطين في العمل الطلابي
قلت :وبعدين يعني حنشرف في السجن تاني في أقل من سنة
قالي :مش مشكلة بس ندخل واحنا عاملين حاجة
قلت : ياعم انت لسه خاطب شوف لك يومين أحسن
قالي : أهو الوضع حيكون أحسن أهو بقي لي حد يسألي عليا مش زيك
وابتسمنا وهرجنا وخرجنا واتكلمنا واتخنقنا مثل يوم وفي الاخر يوصلني بعربيته لحد البيت وأقول نتقابل بكره امتي
محمد القصاص يعني الحنان والود والحب اللي في الدنيا دي كلها
القصاص هو الصاحب اللي مينفعش نزعل منه هو اللي لازم نرجع له ونسشيره في كل شئ ونحكي له عن كل مشكلاتنا لانه هو الوحيد اللي بيشيل مشكلتنا لدرجة انه بتكون همه وتشغل دماغه وتخليه يسيب شغله عشان بس يقابلك ويقولك علي اقتراح او حل للمشكلة
هو صاحب بس بقلب أب وأب بس بقلب طفل نقي وبرئ وطاهر
قصاص زي مركز الجاذبية في الارض ديما تلاقيه قاعد مع ناس و أصدقاء جدد يحبوا يتعرفوا عليه
مواقفه الشهمة لا تنتهي لانه أكثر من عدد أيام العام
وانا في السجن السنة اللي فاتت لم يحمل أحد عبئي مثله وأقول حتي أبي وأمي فتابع هو عملي وتابع طلباتي الشخصية اللي كانت بتوصل اني اقول له هات الشوز من درج معين في البيت أو تعالي زيارة في السجن لمجرد أن يحضر لي ورقة
لحد ما تم اعتقاله في أحداث القضاة في العام الماضي واللي أصر أنه يشارك فيها , رغم احساسه وقتها انه حيتقبض عليه
ولما بقي معايا في السجن رجعنا تاني يدور علي مشاكلي ويخلي ناس من أقاربه أو أصدقائه ينهوا لي أعمالي
حبه لدعوته واخلاصه لفكرته خلاه يهمل شغله ومستقبله ويأجل أهم مشروع في حياته وهو الزواج حتي ارتبط اخيرا في الشهر الماضي بأخت فاضلة
محمد عمره 34 سنة بس ملئية بالنضال والحركة المشرفه لدعوته وللحركة الوطنية المصرية ان منها شاب مصري مثله , كان من أهم الناس اللي قادت الحركة الطلابية في جامعة القاهرة في فترة التسعينات وقاد مظاهرات الطلاب في عام 95 ضد المحكمات العسكرية وتم مطاردته أكثر من مرة واستضافته بأمن الدولة لعشرات المرات وتهديده ان لم يتوقف عن نشاطه فسيتم معاقيته عقاب قاسي
وبالفعل في 2001 تم تحويله للمحكمة العسكرية وكان أصغر اخواني وقتها يحال لمحكمة وتم تبرئته بعد ما اعتقل تسع شهور علي ذمة القضية
مش قادر اتخيل يوم حيعدي من غير ما اشوفه ..مش أقادر اتخيل انه مش حعرف اتكلم معاه حتي علي التليفون
حاسس اني مخنوق جدا واني نفسي غابت عني .