الجمعة، ١ فبراير ٢٠٠٨

هاتجوز

الحدث الهام اللى قولتلكم عليه فى البوست اللى فات هو انى

هاتجوز....او عشان اكون دقيق هاكتب كتابى.
و اهمية الحدث بالنسبة لى و لمن حولى مش لانه حدث سعيد او حاجة تفرحنى, و لكن الاهمية ترجع إلى تأخر هذا الحدث فى حياتى, لدرجة ان من حولى كان اصبح لديهم شبه يقين فى عدم حدوث هذا الحدث الهام و مع اقتراب وقوع الحدث ثارت جدلية بين اصدقائى....
فالبعض _او الغالب_ سعيد و مشجع لى على هذه الخطوة و آثارها الإيجابية..
و البعض حزين و يرى انها تعنى انهيار آخر رموز الصمود الرجولى امام المرأة حتى ان احدهم وصف فعلتى هذه بأنها الحماقة الاولى التى ارتكبها فى حياتى بعدما كنت رمزا للتعقل فى الامور....
و البعض ابتسم لى ابتسامة صفراء بتقول "أخيرا وقعت يا بطل"
و هناك مجموعة سعيدة جدا و هى مجموعة زوجات اصدقائى, فهن يشعرن ان الله قد استجاب لدعائهن أخيرا و ان سعيهن لتزويجى نجح اخيرا.. حتى و ان لم يكن عن طريقهن... فهذا الحدث يعطيهن الامل فى الاستقرار الاسرى و فى عودة ازواجهن الى منازلهم حيث انى متهم دائما بانى احرض اصدقائى على الخروج و السهر خارج البيت, مع انى مظلوم (مش قوى يعنى) لكن مع الاسف فأنا الشماعة اللى كل اصدقائى بيعلقوا عليها خروجهم و تزويغم من بيوتهم...

بغض النظر عن اللى فات و عن كل الآراء و كل النفسيات.. انا بردو قررت
انى اكتب كتابى و انا على رأى عيد السلام النابلسى (مغمض العين, مسدود الانف, اصم الاذن)........... و قصدى طبعا مغمض العين و الانف و الاذن عن كل المعوقات و عن اى حد يحاول ان يحبطى او يرينى عيوب الزواج (باحاول اصلح)..

هاتجوز لأن دى رغبة اهلى (والدى و والدتى).. و انا بصراحة نفسى ارحمهم من قلقهم المستمر عليا و رغبتهم فى الاطمئنان و احساسهم باتمام رسالتهم.

و هاتجوز استجابة لنصائح اخوانى فى الله اللى كتيير نصحونى باهمية الزواج و كتير ذكرونى بقول المصطفى _صلى الله عليه و سلم_ (يا معشر الشباب من استطاع منكم الباءة فليتزوج)
هاكتب كتابى استجابة لضغوط اصدقائى على من اجل ان تتساوى الرؤوس... و كمان عشان زوجات اصدقائى يرتاحوا و يعرفوا ان مش انا السبب..

هاتجوز كمان طمعا فى رزق الله لأن رسولنا الكريم قال ابتغوا الرزق فى النكاح, و طلبا فى عون الله فالنبى يقول ثلاث حق على الله عونهم, منهم الناكح يريد العفاف..
هاتجوز و اكتب كتابى, استجابة لسنة الله الكونية فى قوله ((و من آياته ان خلق لكم من انفسكم ازواجا لتسكنوا اليها و جعل بينكم مودة و رحمة ان فى ذلك لآيات لقوم يتفكرون))


هاتجوز و اكتب كتابى لانى وجدت و رزقنى الله بأسرة كريمة فخور بأن اناسبها و انتمى لها.. اسرة اجد افرادها كلهم و اب و ام لم اجد منهم غر حسن المعاملة و كرم الاخلاق..
هاتجوز و اكتب كتابى لأن اهم سبب و اكبر دافع و هو انى وجدت الانسانة المناسبة ووجدت فيها كل ما اتمناه و بصراحة قلبى دقلها...



هاكتب كتابى يوم الاحد القادم 2008/2/3 الساعة 3 فى قاعة الصفا بدار الارقم بمكرم عبيد بمدينة نصر....
فشاركونى فى اهم حدث فى حياتى

محمد القصاص

هناك ١٢ تعليقًا:

إبراهيم الهضيبي يقول...

ربنا يبارك لك يا صاحبي
واحشني والله

محمد يقول...

يااااه أخيرا

بارك الله لكما وبارك عليكما وجمع بينكما في خير

mostafa mahmud يقول...

تتقدم الجمعية العمومية والمكتب السياسى التهييسى والجناح العسكرى لكتائب "عز الدين القصاص" وجميع عناصرها وأعضائها العاملون والمنتسبون المقيمون والمسافرون, تتقدم بالتهنئة وإطلاق الزغاريط فى الجو والصواريخ فى السماء وتفريق الكفتة والطرب على الحاضرين والغائبين ابتهاجا بإقدام القائد الأعلى و المرشد العام والملهم والمؤسس الأول للحركة(اللى هى بركة)على دخول القفص الذهبى(اللى ماعرفش مين اللى ذهّبه)
وإذ نتقدم بهذه المناسبة العطرة للحاج محمد القصاص وعروسته إيمان بأخلص التهانى والأمنيات بحياة زوجية سعيدة ومليئة بالحمل والولادة والمتابعة عند الدكتور(أوالدكتورة)
والسونار والعيال والبامبرز والسيريلاك والعياط والصريخ والمدارس والدروس و
وتربية العيال
الاقساط وهدوم العيد
والتموين وإيجار الشقة والمية والنور...و....و......وووو
فبارك الله لكما وبارك عليكما وجمع بينكما فى خير
.........وو
إشرب يا حلوووووووووووو


عنهم
مصطفى محمود

يلا مش مهم يقول...

لقد فقدت العزوبية
رجل ولا كل الرجال
فقدت من اذا طلبته وجدته
فقدت من اذا اتصلت به اغلق الخط ليتصل هو بك
فقدت من يملك خريطة مطاعم مصر
فقدت من حول سيارته الي سرفيس اجرة لتوصيل الاصدقاء والاحباء
فقدت الشهم - الشريف - الجدع - العطوف
نعم فقدت كل هذا واكثر
وأما "هي" بتاعت قصاص اللي "هي " ايمان بديني فقد كسبت كل هذا
بارك الله لكما وبارك عليكما وجمع بينكما في خير
وادحرج واجري يا رمان وتعالي علي الاسرة يا رمان
"طبعا غيرت ف الكلمات علشان النسق القيمي ميحصلوش مشاكل
ويلا الف مليون مبروك

غير معرف يقول...

محمود
الف مبروووووووك ياصحبي علي العقد ومش هقولك غير اللي قولتهوك يوم الخطوبة

اننا بنبارك للمتجوزين النصر المبين علي رمز الصامدين وأمير العاذابين ومن بعدك يا أمير بندعي للعاذبين بالصبر والثبات علي فيدهم الجميل بس برده مليووووووووووووووووون مبروك لأجدع أخ في الوجود

غير معرف يقول...

اولا الف مبروك لمحمد وايمان
ثانياالتعليق دة كتبتة بعد الحمد للة ما اتكتب الكتاب وعلى الجواب علشان ما يتفهمش منة اي حاجة وحشة لا سمح اللة بس حبيت اوضح لايمان شوية حاجات بسيطة
بعد ماتمر الفترة الاولى من الجواز ان شاء اللة توقعى مجموعة من السيناريوهات بتحصل فى بيوت كتير دلوقتى
ايمان:اية يا محمد انت فين الساعة دلوقتى 12وانت قلت هاتيجى الساعة 8 بالكتير
محمد:معلش يا ايمان انا على ابو امين باشرب شاى وجاى حالا
بعد مرور ساعتين
ايمان:ها يا محمد خلصت الشاى ولا لسة
وطبعا ايمان هاتصحى تصلى الفجر

ومحمد لسة بيشرب الشاى
و ولا بلاش استنى مشاهد اخرى ها حكيهلك بعدين لانى مشغولة دلوقتى سلام

إيمان البدينى يقول...

السلام عليكم
اولا جزاكم الله خيرا على تعليقاتكم و اخص بالشكر طبعا استاذ مصطفى و الاستاذ مجدى بس بردو ماتحولوش ... للاسف مفيش فايدة.. حاولت احذره بردو بس هو مصر...نعمل ايه بأة..هو حر..و اللى حصل حصل خلاص و العوض على الله

صاحبة التعليق الاخير...جزاكم الله خيرا على تنبيه بس بعد اول سطرين من الحوار لا اعتقد ابدا ان هيكون له باقى اصلا .. بس هو مين حضرتك؟؟؟

غير معرف يقول...

الأخ محمد والأخت إيمان
بارك الله لكما وبارك عليكما وجمع بينكما في خير.
أتمني منكما بعد عقد الزواج ان يتم إثراء المدونة بمقالات يومية او أسبوعية علي الأكثر

غير معرف يقول...

الف مبروك يا عم محمد على الفرح الجميل ده .
ومبروك عليك وحب حبايبك اللى كانوا حواليك ومش عاوزين يروحوا رغم إن الوقت إتأخر جدًا

ومش هانسى أبارك للعروسة اللى أكيد عرفت إنها أخدت عريس ولا كل العراريس ، أقصد العرسان

بجد بجد فرحكما كان ممتاز ومن زمان مش حضرت أفراح زيه ، ورغم إنى مش لحقت العصير بس ولا يهمكم .
برضه مبروك مرتين
مرة لأنكم اتخذتم القرار الصح فى الوقت الصح ، المرة التانية لأن كل البشر دى راحت الفرح رغم إنه كان فى وقت ومكان فى منتهى الغرابة ..
بس ولا يهمكم برضه.. الحب يصنع المعجزات
حب الإخوة لبعضهم طبعا ، وحب الناس لفرحة أخيهم وأختهم
على فكرة الشريط هايل اللى انتم وزعتوه فى الفرح .. مع إنى لسه مسمعتوش بس أكيد هايطلع كويس لأنه من اختياركما

الكواكبي يقول...

1000 مليون مبروك يا قصاقيصو
اشرب يا برنس . . انتهت ايام الانبساط والفرفشة وبدأ عهد الزواج
انا مبسوط فيك مووووت انك خيشت نفس التخييشة اللي كلنا خيشناها
مبروك برضه لإيمان والحقيقة انيت اكتر زوجة ثقباوية محظوظة . . على الأقل جوزك مش هايقول لك انا رايح اقابل قصاص . . هاهاهاهاهاهاهاا
وبالنسبة لباقي الثقباوية الكرام الأخ سامح بركليز وزينهم وحسن هونجا والشيمي والدرجلي ابو صلاح ابن الناظر وباقي الأخوة الحرامية لازم يبدأو يلاقو حجة تانية غير انهم رايحين يقابلوا قصاص . . انا باقترح اننا نخترع شخصية وهمية ونبقى نروح نقابلها كلنا علشان قصاص برضه يعرف يزوغ ويشم نفسه ولو اني شاكك في ولائه الثقبوي وانه هايتحول لكائن بيتي داجن بعد ما كان نجم من نجوم الشوارع والأرصفة . . يا اما هايبقى البديل اننا نخلي لقائتنا كلها في يوم واحد ونزوغ منها زي العيال بتوع ثانوي

مبروك تاني يا قصاقيصو ومبروك يا ايمان وما تقلقوش على الثقب . . للثقب رب يحميه

غير معرف يقول...

انت بتقول:و اهمية الحدث بالنسبة لى و لمن حولى مش لانه حدث سعيد او حاجة تفرحني

اخص عليك يا وحش!!

دانتا كئيب. الله يكون في عونها!

بس بجد..مين الـ... اللي ... في عقلها واخدت هذا القرار!!؟

لا بجد!!

هي أكيد زيك !!

عموما ألف مبروك..رفقة صالحة ان شاء الله

بارك الله لكما وبارك عليكما وجمع بينكما في خير.

..باقولك.. خلي بالك..انت لسه في كتب الكتاب :)

امضاء
أخوك الغلبان اللي اتصلت بيه يوم الفرح..حد يتصل يوم فرحه ..اتصل قبلها بشهر يا أخ محمد!
مش قبلها بيوم ولا يومين. ولا ماكنش معاك رصيد؟
آه مانتا بتتجوز بقى
انت علمت كده ليه في نفسك يابني..مش كفاية احنا..
عموما ربنا يتكفل بيكم :)
ماتنساش تطلع بطاقة التموين

عموما انا في انتظار الفرح..

وفي انتظار أي دعوة على أي إفطار أو أي حاجة..
عارف لو طنشتني زي كل سنة..

بعت لك ايميل على فكرة شوفه في الجنق

غير معرف يقول...

السلام عليكم
ألف مبروووووووووك يا أموني
و مبروك ليك يا محمد ... بجد انت مرزق .. و أنا بعذر الناس إلي بيتكلموا عن قفص الزوجية ... أصلهم ما يعرفوش إيمان !!
بس حبيت أقولك يا ايمان ... ولا يهمك من الكلام الي اتقال ده كله !!!
لأنك ان شاء الله هتثبتي للكل سواء ثقب أسود أو أبيض إن الموازين هتختلف ...
و بيت محمد إن شاء الله هيبقى جنة .. و هينفض للكل و يرجع البيت جري... وهيشرب الشاي معاكي
بس يا رب يلاقيكي ساعتها!!!!