السبت، ١٤ يوليو ٢٠٠٧

13/3/2007

السلام عليكم

اترددت كتيير قبل ما اكتب البوست دة لاسباب مش مجال ذكرها دلوقتى بس المهم أن انا في الاخر قررت انى اكتبه....قررت أن انا اكتب عن ليلة 13/3/2007 و هي ليلة ما محمد اتقبض عليه...

نبدأ الموضوع من الاول شوية ....
يوم الاتنين 12/3/2007 كنت راجعة من الكلية على الساعة خامسة تقريبا....هلكانة كالعادة...كلمت محمد عااادى جدا و دخلت نمت شوية عشان بعد كدة اصحى اذاكر عشان كان عندى امتحان ميد ترم يوم الاربعاء
صحيت الساعة عشرة لاقيت محمد متكلم على الموبايل اربع مرات...اتصلت بيه لاقيت الموبايل مغلق....قلت عادى شوية و هيخلص "المشوار" اللى هو فيه و يتكلم و قمت و صليت العشاء و حضرت مذاكرتى و جربت اتصل تانى بردو التليفون مغلق....قلقت...و لمدة ساعة و نص كل شوية اتصل و الاقيه مغلق.....لدرجة أن انا قلت هلاقى حد من
اصاحبه متصل يقولى انه اتاخد فعلا.....و طبعا لا ذاكرت ولا بصيت في كتاب

فيييييييييين بقى على الساعة 12:30 كدة محمد ربنا كرمه و اتصل...(.و مفيش داعى للخوض في تفاصيل


المكالمة )...قاللى الموبايل خلص شحنه و انا مروح دلوقتى ولما اوصل هاكلمك ...و فعلا وصل البيت الحمد لله ...واتصل بيا...الساعة دلوقتى 1:30 و عرفت أن د/محمود غزلان اتقبض عليه و انهم مشغولين كانوا مع محمد غزلان ..و بعدين قعد يطمنى أن كدة الليلة عدت خلاص و ان مفيش قلق خلاص و روحى ذاكرى و اطمنى.... و مكملش كلامه و لقيته بيقولى لحظة واحدة ...قام و رجع

محمد: إيمان انا باتاخد
انا: يعنى ايه ؟ ايه اللى حصل؟
محمد: عربية الترحيلات تحت البيت اهة و الله........سلام دلوقتى
انا: لأ استنى لحظة فهمنى ايه اللى حصل
محمد: طيب استنى لحظة

اتصل بوليد صاحبة قال له أن هو انهم جم ياخدوا ووصاه يطمن على والده ووالدته و قفل معاه..و رجع كلمنى تانى....

محمد: انا لازم اقفل دلوقتى هيكسروا الباب ولازم اصحى ماما و بابا عشان ميتخضوش ....كلمى اسلام قوليله... و ابقى كلمى ماما و بابا اطمنى عليهم...و ادعيلى....لا إله الا الله

بصراحة انا مش فاكرة انا رديت قلت ايه...او اذا كنت رديت اصلا...لان انا غالبا لما باتخض بارتبك و مش باعرف اكلم اصلا

قفلت معاه و كلمت زوجة اسلام قلتلها على اللى حصل....قعدت توصينى انى ادعيله بالثبات و الصبر

بعد شوية اتصلت في البيت عند محمد...والدته اللى ردت عليا...كان الناس لسه عندهم بيفتشوا ....طبعا طنط كانت بتعيط و حاولت اهديها بس كان صعب اوى انها تهدى و هي شايفها ابنها بتاخد منها منغير ذنب...دة غير أن انا اصلا مكنتش لاقية حاجة اقولها ممكن تهون عليها...طبعا حاولت تخلي محمد يكلمنى و طبعا الظابط مرضيش ....فقالتلى ادعيله يا ايمان و متزعليش و قفلت معاها

الساعة دلوقتى كانت تقريبا 2:30 ...والدتى صحيت من النوم....حكيتلها على اللى حصل...قعدت تهدينى شوية و بعدين قالتلى شوية و كلميهم اطمنى عليهم و قومى دلوقتى اتوضى و صلى و ادعيله...

قمت فعلا اتوضيت و بعدين كلمت طنط تانى ...قالتلى انهم لسة نازلين دلوقتى بعد ما اخدوا اللى ربنا قدرهم عليه....ووصتنى على امتحانى و مذاكرتى

قفلت معاها و قمت اصلى ركعتين...و انا واقفة اصلى قرأت الفاتحة و سبحان الله زى ما اكون نسيت اى حاجة انا حفظاها من القرآن و مش على بالى غير آية واحدة بس قعدت ارددها طول اربع ركات الآية كانت

"ولا تحسبن الله غافلا عما يعمل الظالمون"

و كانت نعمة كبييرة اوى من ربنا لأن الآية دى ثبتتنى جدا في الوقت دة

خلصت صلاتى و قعدت ادعى و اقرأ قرآن لحد ما الفجر اذن ... صليت الفجر و قلت الاذكار ...حاولت انام معرفتش ...فدخلت على النت و قريت الخبر على أنا أخوان و قريت التدوينة بتاعة أ/مجدى سعد....و قمت احضر نفسى عشان انزل الكلية

دة كان تقريبا اللى حصل ليلتها....و على اى حال هي ليلة لن انساها

ربنا يفك اسر جميع المعتقلين إن شاء الله .......
.و يخلص مصر من هذا النوع من الليالى التي لا تنسى قريبا بإذن الله

هناك ٧ تعليقات:

Saad El-Shater يقول...

السلام عليكم

ربنا معاكم
ويفك اسرانا كلهم

غير معرف يقول...

ازيك يا ايمان

اصعب شيئ لما تكونى حسه ان فى حاجة بتحصل و ظلم بيقع وانتى مش عارفة تعملى حاجة او توقفيها

بس عموما تأكدى انها اكيد فادتك وقوتك وكسرت حاجز عندك
وحسستك ان كل قدر الله خير

كفاية انك عرفتينى يا بنتى
:)

ربنا يعيدهم جميعا سالمين قريبا ان شاء الله

الكواكبي يقول...

فرجه قريييب جداً بإذن الله
ان شاء الله محمد يخرج في اقرب فرصة وفي العرض اللي فات رئيس النيابة أخد الملف بتاعه ودخل بيه للمحامي العام بس واضح ان كان فيه حسابات تانية أجلت موضوع الإفراج عن محمد بس فيه وعد ان في اقرب انفراجة للقضية هايكون محمد مخلى السبيل ان شاء الله

رسالة للأخت إيمان وللقصاص: قدر الله لا]اتي إلا بخير . . والضربة التي لا تقصم ظهري تقويه؛ وأظن ان بداية علاقتكم بإبتلاء من هذا النوع ومقدرتكم على أن تتجاوزوه وتتحملوه هو بشارة خير أن كل ما سيأتي بعدها من صعاب هي محض صغائر ستكونا قادرين على تجاوزها والتغاضي عنها إن شاء الله

غير معرف يقول...

ربنا يكرمك يا ايمان ... وان ربنا بدا علاتقتكم بابتلاء ده يدل على حبه ليكم

ربنا يقويكى يارب .. ويرجعهولك بالسلامه

غير معرف يقول...

ربنا يرضى عنك يا إيمان..
بصي.. أنا شفت حلم -ونااااااااااااااااااادرا لما بحلم.. لكن إن شاء الله يكون خير..
على ما أظن ان عيد ميلادك يوم 22 الجاي؟ وأتمنى ان محمد هايحتفل معاك بيه بإذن الله

غير معرف يقول...

طبعا ربنا يثبت محمد واهله بس اللى انا عايز اقوله يعنى رغم انها محنه وصعبه وعسيرة ولكن يزول الالم ويبقى الاجر ان شاء الله محمد انا متاكد بعد ماهيخرج بخمس دقايق كل الالم هيتنسى كل حاجه هيرجعلنل يعنى كلنا استاذ وصديق ونموذج للجدعنه انا ماشفتش زيه كتيي ر ومنيترك لذائذها جهادا يجد فى الخلد جنات ظلالا ومن ينفق لدعوته متاعا يزده الله تكرمة ومالا حاتم ثابت

محمد القصاص يقول...

السلام عليكم

الاخ سعد
جزاكم الله خيرا...و ربنا يفرج عن الجميع ان شاء الله
------
اسماء...معاك حق فعلا فى كل كلمة قلتيها خصوصا حكاية ان كفاية ان عرفتك...اكيد دة مش شوية
بس بجد معرفة انا باعتز بيها جدا
------
جزاكم الله خيرا يا إسلام......و نسأل الله ان يرزقنا الثبات
-----
اسماء او مؤة بقى عشان نفرق
جزاكى الله خيرا.....و ادعيلى
-----
اللى بعد اسماء معرفش انتى مين بس اقدر اخمن...عموما شكله كدة احسن لك متحلميش..لان الحلم دة صعب شوية لان العرض هيبقى يوم 22 يعنى راحت عليا خلاص
-----
استاذ حاتم...جزاكم الله خيرا و نسألكم الدعاء