السبت، ٢١ أبريل ٢٠٠٧

تلاتين يوم فى السجن

السلام عليكم

يمكن يكون الكلام اللى هاكتبه فى الأول دة ملهوش علاقة بالعنوان ولا ببقية البوست بس هي مجرد خاطرة جاتلى بعد الأحداث المتلاحقة و الكئيبة اللى مرينا بيها الفترة اللى فاتت.. و بصراحة انا كنت فى الأول ناوية اكتب حاجة شديدة الشبه باللى
أ/ مجدى- يللا مش مهم كتبه تحت عنوان بحبك يا بلدى بس بصراحة لما قريت التدوينة دى حسيت أن احنا فى نعمة كبييرة اوى و حمدت ربنا على كدة و النعمة دى هي حبنا للبلد دى.. بجد و الله دى نعمة .. نعمة أن الواحد يبقى عنده فكرة عايش عشانها و يبقى عنده هدف نفسه يوصلله حتى لو لاقى صعوبات فى سبيل كدة.. انا كنت دايما باستغرب من أن الناس مش حاسة ومش فاهمة و مش فارق معاها حاجة و أن معظم الناس عيشة بمدأ أهى عيشة و السلام ..و كنت احيانا بفكر طيب لو كنت عايشة بنفس المبدأ دة هل كنت ممكن اكون راضية و سعيدة واهو على الأقل مكنش هيفرق معايا حاجة لما اعرف أن الدستور اتعدل ولا أن بلدى بتتسرق و لا أن اهل بلدى بيتحاكموا و يتسجنوا بتهمة حب البلد دى .. أو يمكن اصلا مكنتش هاسمع حاجة زى دى و بالتالى هاحس أن الدنيا بخير و أن مصر بلد الأمن و الامان
طبعا لأ!!!
ماعتقدش أبدا انى ساعتها هاعيش راضية و سعيدة ...و ماعتقدش انى هيكون دة معناه أن انا عايشه اصلا...لأن ببساطة ربنا مخلقناش عشان نعيش و السلام..
سعتها حمدت ربنا انه انعم علية بهذه النعمة و ساعتها بردو حسيت اد إيه
بحبك يا بلدى


رسالة :30 يوم فى السجن


نرجع بقى لعنوان البوست "30 يوم فى السجن" و دة عنوان الرسالة اللى محمد بعتها بمناسبة مرور شهر على سجنه(متأخرة كام يوم بس معلش ..كان عندى امتحانات) ... الرسالة بتقول:

السلام عليكم
بالأمس مضى شهر على حبسى (قبض على فجر 13/3) و لأن شر البلية ما يضحك فقد تذكرت فيلم ( 30 يوم فى السجن) و هو فيلم مثله فريد شوقى فى ستينيات القرن الماضى و هو مأخوذ عن مسرحية لنجيب الريحانى و بديع خيرى, و الفيلم لم يذكر...
الفيلم فائم على مبالغة كوميدية طريفة وهى الحكم بحبس احد الأشخاص نتيجة لقيامه بحرق "فردة شنب النجعاوى" و استأجاره لشخص آخر ليسجن مكانه و بغض النظر عن التفاصيل إلا أن هذه المبالغة كانت طريفة و مضحكة جدا لأن المشاهدين لم يتخيلوا أن يسجن احدهم بسبب شديد التفاهة كحرق شنب..ولكن يا حضرات بعد دخولى السجن عدة مرات و بعد حوالى 40 سنة على الفيلم و جدت أن الفيلم ليس فيه اى مبالغة فى بلدنا العزيز و الذى تسن فيه القوانين و يسن دستور يسمح للنظام أن يسجن اى مواطن لأتفه الأسباب و احيانا بدون أسباب و كله بالدستور و كله بالقانون و احيانا...بل كثيرا... كله بالمزاج.
فيلم 30 يوم فى السجن قدم لنا نوعية اللصوص فى القرن الماضى مثل حرامى الغسيل و النشال و نصاب المولد, اما اللصوص فى زمننا هذا فهم نوعية مختلفة فمنهم المحافظ المرتشى, و وزير استغل منصبه, و حيتان السكر و السيارات و نواب القروض و غيرهم, و فى الفيلم بطل الفيلم قضى 30 يوم و خرج أما انا فقضيت 30 يوم و لا زال امامى 15 أخرى على الأقل (حسب اوامر النيابة) او حتى اشعار آخر, بطل الفيلم عرف تهمة و عقوبة محددة و انا لا اعرف تهمتى و لا مدة لعقوبتى ...و لأن (30 يوم فى السجن) فيلم عربى فقد انتهى نهاية سعيدة و تزوج البطل من البطلة و عاشوا فى تبات و نبات... أما فيلمى فلا أعرف نهايته و لكن لن تكون النهاية السعيدة هي خروجى من السجن لأتزوج من خطيبتى , بل النهاية السعيدة بالنسبة لى هي خروج كل المصريين من سجنهم الذى وضعهم فيه حكامهم المستبدين.
و السلام عليكم و رحمة الله و بركاته
محمد القصاص_ سجن مزرعة طرة-عنبر 1 فى 14/4/2007

هناك ١٣ تعليقًا:

الكواكبي يقول...

قصدك ايه يا قصاص ان (جوازك من خطيبتك) مش هو النهاية السعيدة؛ الكلام ده خطيييير جداً ولولا انك في السجن كنت قلت عليك بتلعب بديلك يا شقي
وعلى اي حال انا باهدي النفوس بينك وبينها ومش قصدي اي شيء وحش لا سمح الله
انما بالمناسبة يا ابو قصاص . . هي روايح لسه في السجن ولا اتنقلت؟ انا مش قصدي حاجة ويا ريت ما تفهمنيش صح :)

وليد يقول...

أنا بس ليه طلب قبل التعليق
يا سلام لو تعملي سكان للرسالة بتاعة محمد وتنشريها بخط إيده ده هيبقى ليه بالغ الأثر على القراء .. أولا لن تتكلفي عناء فك شفرة الرسالة لأني أعلم الناس بخط القصاص ... ثانيا سنشعر بمحمد اكتر .... وثالثا اعطاء فرصة للباحثين في مجال المخطوطات للعمل ففي ظني من الممكن لأحد الباحثين أن يسجل رسالة الدكتوراة الخاصة به في رسالة من رسائل القصاص

أما التعليق فخاص بتميز القصاص في كل شئ فمرجعية القصاص في الاستشهاد هيه مرجعية متعددة مرة أية ومرة حديث ومرة أغنية ومرة فيلم أنا خايف المرة الجاية يستشهد بيفيديو كليب ...
أما موضوع روايح يا اسلام مينفعش يتفتح على البلوجاات ده موضوع خاص زي ما انت عارف وعارف ان القصاص دمه حااامي وميحبش حد يجيب سيرة روايح أنا طبعا عارف مقدار سماحتك وطيبة وحسن نيتك وانك لا تقصد اي شئ ..ز وربك يهدي النفوس والسرائر وبعدين مفيش حااجة بتستخبى للنهاية
وليد

محمد القصاص يقول...

السلام عليكم

جزاكم الله خيرا يا إسلام على هذا المرور الطيب و على تهدئة النفوس و قصة روايح دى هاعرفها ان شاء الله بس حظه ان انا مش هاعرف اروحله غير بعد اسبوعين بسبب امتحاناتى..بس ربنا يسهل و مكنش نسيت ساعتها

و ربنا يهدى النفوس


اخ وليد جزاكم الله خيرا على الإقتراح بس انا لو عملت كدة يبقى الرسايل مش هتوصل...انا ممكن ابقى انزلها حاضر بس بردو لازم افك الشفرة واكتبها بنفسى..و يللا كله بثوابه

AbdElRaHmaN Ayyash يقول...

وقع بيان المدونين للتضامن مع عبدالمنعم محمود
شارك بتوقيعك
أنشر البيان في كل مدونة تعرفها
ساهم في حرية المدونين .. وحرية منعم
http://free4monem.blogspot.com/
-----------
ربنا يفرج عن القصاص و منعم وينقم من اللي ظلموه
:( هانت يا بلد

الكواكبي يقول...

لا شكر على واجب
انا من زمان نفسي اخدم ميشو بأي شكل
عموماً انا مش عايزك تقلقي خالص من موضوع النسيان . . انا ممكن اخلي زوجتي تبقى تفكرك وربنا يقدرنا على فعل الخير :)

عمر أفندى و أبووه يقول...

قصاص

وحشتنى جداً و مقصر فى حقك جداً جداً جداً و نفسى اشوفك جداً

بالنسبة لموضوع روايح هنتناقش فيه انا و اسلام على القهوة لحد منشوفك...

بالنسبة لموضوع الخطوبة و الجواز و النهاية السعيدة مفيش مانع كلنا اكيد هنسعد بخروج المصرين يا حمام جداً و الله بس يعنى يا سيدى افرح شوية بالجوازة اللى ضلمت من اول طلعة دى ....ربنا يبارك فيكى و يجزيك خير على ما تقومين به من اجل تواصل محمد مع من يحبونه بجد

يلا مش مهم يقول...

ثقبوي علي حق يا صاحبي
يعني في سجنك وبتضرب مثل بفريد شوقي وفيلم تلاتين يوم في السجن يا اخي دانات قلبك قاعد
واحشني موت يا صاحبي وسامحني علي تقصيري في حقك والله الشغل كابس عليا بشكل ربك يعيني عليه
وبعدين احمد ربك انك خطبت مش زيي مش لاقي حد يرضي بظروفي الملخبطة دية انت عارف يا صاحبي انا علشان انسي بعد الخبطة اللي فاتت بعمل ايه بشتغل حوالي اربعتاشر ساعة في اليوم لغاية لما ما بشوفش قدامي وبرجع اتفرج علي الجزيرة خمس دقايق وانام
المهم يا صاحبي بكرة تخرج بالسلامة وتتجوز "فاكر فيلم باب الحديد وم يا جناوي يا بني هاجوزك هنومة " وهاجي احضر الفرح وهابقي عامل زي اعلان شلل الاطفال اللي الولد كان واقف بيعيط وزمايله بيلعبوا كورة وهو مش بيلعب علشان مخدش التطعيم وهو صغير
المهم يا صاحبي هاجيلك باذن الله وبدعي من قلبي انك تخرج قبل ما اجيلك وفرجه قريببببببببببببببببببببببببببببببب

الـفجـريـــة يقول...

أولا..ربنا يعينك فى الامتحانات يا ايمان..وهتعدى..كل الامتحانات هتعدى

الامتحانات بتاعت الدراسة هتعدى

وامتحان الاعتقال هيعدى

وامتحان فراق أى حد يهمنا..بردو هيعدى

بس يارب احنا نعدى فيه كويس

سلامى لكى كثييييير

غير معرف يقول...

السلام عليكم
أسال الله أن يفك أسرك يا أخي قريبا ان شاء الله
ويعيدك الى تك الحياة التي من الواضح ان
لك فيها بصمات قوية في حياة الكثيرين
وان تكون قد استجمعت المنح من تلك المحنة
أما بالنسبة لامر النهاية السعيدة فبالتاكيد معك حق لكن لا مانع ان
تكون هناك نهايتين سعيدتين
ولا ايه رايك يا ايمان؟؟؟؟؟؟؟
التوقيع
أخت في الله

محمد القصاص يقول...

السلام عليكم

جزاكم الله خيرا يا اسلام و الله تعبينك معانا....و كله فى ميزان حسناتك إن شاء الله

ا/ابو عمر جزاكم الله خيرا على المرور الكريم و انا وصلت سلام حضرتك لمحمد و هو بيسلم على حضرتك و دعوات حضرتك لينا بس و مفيش حاجة هتضلم إن شاء الله

ا/ مجدى ربنا يعينك فى شغلك إن شاء الله و يرزقك باللى ترضى بظروف حضرتك إن شاء الله ..جزاكم الله خيرا على التعليق...و اكيد فرجه قريييب إن شاء الله

اسمااء...قلتيلى هاشوفك الزيارة الجاية و مشفتكيش لحد دلوقتى..ربنا يكرمك يا رب و يجزيكى كل خير و يعدى الإمتحانات كلها على خير ....و دعواتك

هاجر.....جزاكى الله خيرا كثيرا...بجد...
و بالنسبة للنهاية السعيدة اللى تعباكو كلكوا دى ...يا جماعة خللو عندكو حسن ظن فأخوكو نهائيا..هو قال كدة لان الزواج مهواش نهايه و انا واثقة طبعا ان دة كان قصد محمد ...حتى لو هو مقالش :)

مشروع انسان يقول...

لا ان شاء الله نهايته هتبقى خير بجد ده وعد الله لعباده واذا نظرنا فى التاريخ القديم والحديث فسنرى ما يؤيد كلامى هذا فهذا وعد الله لعباده الذين ضحوا بكل غال ونفيس من اجل دينهم وتحرير اوطانهم ممن يريد لها الشر

واحد من الإخوان يقول...

انا قابلت محمد مرات معدودة

لكن بجد لفت نظري
في ذوقة العالي
وحرصة على مشاعر اللي قدامة

و تعابيير وشة اللي ما فيهاش غير الإستقبال الجيد والإرتياح

ربنا يفك اسرة يارب

وتكون دي اخر ثلاثين يوم

محمد حمزة

الكواكبي يقول...

السلام عليكم يا ايمان اتمنى تكون امتحاناتك ماشية بشكل كويس
يا ريت يبلغي قصاص سلامي الشديد والعنيف لأنه واحشني جداً وللأسف مش عارف ادبر وقت آجي له فيه
وبلغيه ان عبدالمنعم كويس وبقى يصلي معظم الصلوات لأنه محبوس مع المهندس نادر توفيق وهو حالياً بدأ يقنعه بالإسلام :)
يا ريت يبعت لي جواب - يكون ممليه لحد علشان اعرف اقراه - يتكلم فيه عن ظروف السجن ولو فيه مضايقات
ولو مافيش مضايقات يتصرف لن فيه ناس بتوع حقوق الإنسان عايزين يعملوا اي واجب معاه :)
يا ريت يبلغ سلامي للجميع وخصوصاً للدكتور غزلان
سلامٌ الى اجلٍ قريب