فى مدونته الكواكبى..إشمعنى اخترت البوست ده عشان ابدأ بيه..مش مهم..هو كدة و خلاص...كلمة اخيرة بس قبل ما انزل البوست...
قصاص . . الصدر الحنين
لأول مرة احاول اكون جملة واحس بالعجز والاقي الحروف بتهرب من بين صوابعي!! يمكن حروف الكلام هي كمان رافضة تستوعب ان قصاص حبسوه تاني ؛ وان القصاص الشخصية المتفائلة دوما والحالمة بيوم تكون فيه مصر حرة مرمي جوه السجن
من زماااان ما حسيتش بشعور اني غريب عن نفسي ومن زماااان لم احس بالرغبة في البكاء زي ما انا حاسس بيها دلوقتي
المشكلة اني مش قادر احدد سبب الشعور ده ليه؟ اصل اللي كان يشوف علاقتنا بمحمد سواء كنت انا ولا عبدالمنعم ولا اي حد من الشلة الموقرة مش هايصدق كم الحزن والكآبة اللي بقوا مسيطرين علينا
ابقى كداب لو قلت اننا كنا كنا مستنسخين من بعض او بينا توائم عقلي . . بالعكس
كل يوم كنا بنتخانق مع قصاص . . بس برضه كنا كل يوم بنتصالح ؛ بس مش علشان احنا ملايكة ولكن لأن القصاص قلبه كبير
يمكن كنا دايماً نختلف معاه في بعض الأمور؛ زي حركته او أدائه؛
نختلف معاه في اهتمامه الزائد بدعوته وفكرته ومبادئه على حساب شغله ومستقبله؛
كنا دايماً نتخنق من دفاعه الدائم عن الإخوان وانه ما بيقبلش اي مساس لا من قريب ولا من بعيد لا بالجماعة ولا قيادتها ولا حتى افراد في الصف ودايماً كان يجد للجماعة العذر والمبرر
كنا بنختلف معاه في احتوائه لينا في كل مرة بنزعل معاه بغض النظر عن مين فينا اللي غلطان رغم ان في كتير من المرات بيكون ليه الحق في انه يزعل؛
اختلفنا معاه في مسايرته وخفضه جناحه لكل الناس
كنا بنحس انه بيدادينا زي ام اي واحد فينا . . طب والله قصاص كان بيهتم بي عن امي مش علشان امي مقصرة لا سمح الله بس ما حدش بيتابع واحد عنده تلاتين سنة في شغله وصحته ومزاجه واصحابه ودعوته وفي جده وهزله زي ما قصاص كان بيعمل
يمكن زعلان عليه علشان كنت لما باشيل هم حاجة اروح ارمي عليه
او لما كنت اتزنق في تصليح العربية مثلاً وهو عارف اني باتخنق من وقفة الميكانيكي بياخدها هو يعملها
يمكن علشان لما كنت باتزنق في توصيلة لأهلي كان هو اللي بينجدني
او ممكن علشان كنت لما ابقى مسافر ومراتي تحتاج حاجة ما كنتش بالاقي حد مؤتمن غيره اخليها تلجأ له لحد ما ارجع
اللهم العن مبارك وحبيب العادلي وظباط امن الدولة : عاطف الحسيني واحمد مجدي واسامة الجبالي وحسن عبدالحميد وحسام عبدالحليم
وخلص مصر منهم ومن نجاستهم وظلمهم وبطشهم يا قوي يا مكين
ربنا يرجعك لينا يا قصاص
هناك تعليقان (٢):
اللهم امين
اللهم انهم لا يعجزونك فا ارنا فيهم عجائب قدرتك
فهم ظالمون
اللهم انصرنا وانصر دعوتك يارب العالمين
تحياتى
نسال الله عزوجل ان يفك اسرك يا قصاص وان ينتقم ممن ظلمك... واسال الله عزوجل ان يجازيك بكل لحظة ظلم تعيشها خلف قبضان الزنازين العفنة....
براء الاناضولي
إرسال تعليق